ආම් ෆක්ස්මෝල්ඩර්, එෆ්බීආයිස්පෙෂල් ඒජන්ට් | ඈ....මක් කිව්වා මයෙ පුතේ.....!

එක්ස් ෆයිල්ස් කියන්නෙ මම කැමතිම කතා වලින් එකක්. කොටින්ම මම මෝල්ඩර්ට සලකන්නෙ අපේ අයියා කෙනෙක්ට වගේ.

අපරාධ ස්ථානයකට හරි, පිටසක්වල යානාවක් ආපු තැනකට හරි ගිහිල්ලා එයා තමන්ව හදුන්වා දෙන හැටි බලන්න මං කට ඇරගෙන බලං ඉන්නෙ.

මං මේ කියන්නෙ, මොල්ඩර් කොන්ඩේ වැඩිපුර වවලා පස්සට පීරලා හිටපු කොල්ලා කාලෙ. ස්කලී කෙට්ටු කාලේ. මම චූටි මහත්තයා කාලේ.

“ආම් ෆක්ස්මෝල්ඩර්, එෆ්බීආයිස්පෙෂල් ඒජන්ට්” අන්න වැකිය!

මෝල්ඩර් ඒ කැල්ල නං දෙනවා ඉස්ම යන්ඩ! කොටින්ම මමත් ඔය කෑල්ල අහන්ඩ තමා වැඩියම කැමති. ‍

මම ඔය කෑල්ල ඉස්සරහට හම්බෙන ඕනැ කෙනෙක්ට කියනවා. අන්න එහෙමයි මම ඒ කොටස මෝල්ඩර් වගේම කියන්න පුරුදු උනේ.

“ආම් ෆක්ස්මෝල්ඩර්, එෆ්බීආයිස්පෙෂල් ඒජන්ට්”

“ඇ.....මක් කිව්වා මයෙ පුතේ.....!” ඒ කතන්දර සීයා. ඒගොල්ලන්ට ඉතිං ඕවා තේරෙන එකක් යෑ. පව් ඒ අතින්!

ඉතිං සෙනසුරාදා රොබින්හුඩ් බලලා ඉරිදා දවසේ කෙහෙල්කොටුව දෙක කරනවා වගේ, බදාදා එක්ස් ෆයිල්ස් බලලා බ්‍රහස්පතින්දා අපේ මුලු හවස් ජාමෙම ඇරෙන්නෙ ඉන්වෙස්ටිගේෂන් වලට.

මම ඔය විදිහට කොච්චර කේස් ඉන්වෙස්ටිගේට් කොලාද?

හැබැයි මම වැඩිපුරම කැමති අපේ නංගියි, නංගිගෙ යාලුවා දෙශානියි, (දේශා‍නි ඇවිල්ලා චාලි මුදලාලිගෙ මිණිබිරී) මීනු අක්කයි, (ටොපි කොල හතලිහේ කතා වස්තුවේ විට්ටර් මාමගේ දුව), යි එක්කහු වෙලා සෙල්ලම් ගෙවල් දාගෙන රාමෙට වැලි බත් උයද්දි, සෙල්ලම් ගෙදරට කඩා පැනලා ඒ ගොල්ලං හංගං ඉන්න සක්වල ජීවියා හොයා ගන්න එකට.

සක්වල ජීවියෙක් කියන්නෙ අපි මේ ලොකෙට එන්න කලියෙන් ඉදලා මේ විශ්වයෙ කරක්ගහපු කට්ටියක්. ඒ ගොල්ලං පරිණාමය වෙච්ච කාලෙත් එක්ක බලද්දි අපි තාම හෝඩියෙවත් නෑ. කොච්චර උනත් ඒ ගොල්ලං අපිත් එක්ක වැඩි බජනෙකට එන්නැ. ඒත් හොරෙං ඇවිල්ලා කාගෙහරි බෙල්ලෙ “ඔත්තුතහඩුවක්” හයිකරලා යනවා. ඒ අපි ඒගොල්ලං එක්ක හරි හරියට වැඩ කරන්න සුදුසු තත්වෙට දැන්වත් ඇවිල්ලද කියලා බලන්න වෙන්නැති.

වැඩේ කියන්නෙ අපි හදාගෙන තියෙන කුලමල බේද, ජාති බේද, ආගම් බේද, පක්ෂ බේද, දේසසීමා අමතක කරලා මේ ලෝකෙම තනි යායක් වෙනකං ඒ ගොල්ලං නං අපිත් එක්ක එක්කහු වෙන්නැති වෙයි කවදාවත්. මොකද ඒ ගොල්ලං එච්චරට මනස දියුණු කරපු අයනෙ.

අපේ ලොකේ කව්රු හරි හිතාගෙන ඉන්නවනම් යකඩ කන්දරාවකින් හදපු රොකට් එකකට, ‍මුලු අරාබියෙම තියෙන තෙල් පුරොලා හරි, ලොකුම ලොකු ෆුට්බෝල් පිට්ටනි සීයක් තරම් ලොකු ඉර එලියෙන් බලය ගන්න සුර්යකොෂ හයිකරං හරි සක්වල ජීවියෙක් හොයාගෙන යන්න පුලුවන් කියලා, එයා හොද මොලේ අමාරු කාරයෙක් වෙන්ඩ ඕනැ. ඒකට ඕනැ ඔය දෙකම නෙමෙයි කියලා මෝල්ඩර් කොච්චර ලේසියෙන් පහදලා දීලා තියෙනවද!

ඒත් ඒවා ඉතිං අපේ නංගිලාට, මීනු අක්කලාට ලේසියෙන් තේරුම් කරන්ඩ පුලුවන් දේවල් කියලා ඕගොල්ල හිතනවද?

ඒ මොනා උනත් පිට සක්වලයෝ මෝල්ඩර්ට කරන්නෙ හරිම කැත වැඩක්. ඒ එයාගෙ නංගිව සක්වල යානෙක දාගෙන එහෙ අරං යන එක. වැඩේ කියන්නෙ මක් කරලවත් මෝල්ඩර්ටවත් තාම හොයා ගත්න බැරි උනානේ නංගිට වෙච්ච දේ. අඩුම ගානේ ගෙනිච්ච ද නැද්ද කියලවත්......!

ඒ කෝක උනත් මට ලැබිච්ච ආරංචියකට මම යනවා අපේ නංගිලා, ඒ ගොල්ලංගෙ සෙල්ලං ගෙදර හංගං ඉන්න සක්වල ජීවියා හොයා ගන්න. එහෙම උනොත් මොකක් හරි විස්තරයක් හොයා ගන්න බැරි වෙන එකක් නැ.

මම එක පාරට කාරෙකෙන් බැහැලා දොර ටිකක් සද්දෙට වහලා, සැහැල්ලු ගමනෙන්, බැරෑරැම් මුණක් හදාගෙන, පැත්තකට පොඩ්ඩක් බර වෙලා, හරියට මො‍්ල්ඩර් වගේම තමා.......යනවා සෙල්ලං ගේ දොර ගාවට.

“හැබැයි අද නං අම්මට කියනවා” නංගි දොර හරස් කරනවා.

“ආම් ෆක්ස්මෝල්ඩර්, එෆ්බීආයිස්පෙෂල් ඒජන්ට්!!!” දන්නවනේ ඒ මම. ඒ ටිකනං දෙනවා ආය......

ඉතිං මම දොර හරස් කරගෙන ඉන්න නංගිව පයිසෙකට මායිං කොරන්නැතුව කාටත් පේන්න එෆ්බීඅයි එකෙන් දුන්න අයිඩී එක උරුක්කොරං මං ගෙට රිංගනවා.

“හැබැයි වලං පෙරලුවොත්නෙ.......” දේශානි ලිබ්බොක්කට පනිනවා. එයත් දන්නවා මගේ ඉන්වෙස්ටිගේට් එකේ තරම.

“ඕහෝ.....මෙතන ද ඕගොල්ලං පිටසක්වල ජීවියා හංගං ඉන්නෙ... අයින් වෙන්ඩ කරුණාකරලා...... අපිට මෙතන චෙක් කරන්ඩ තියෙනවා”. “ඔහෝ” කියලා සාමාන්‍යයෙන් කතා කරන්නැති උනාට ඒ කෑල්ලෙන් තමා අර ගතිය ගන්නෙ.

“මොකෙක්..... හංගං ඉන්නවා. යන්ඩ චූටිමහත්තයා අයියේ....හැබැයි නැන්දට කියනවා.....”

“අයින් වෙන්ඩෙපා දේශානි ඔයා..........” ඒ මීනු අක්කා. එයාට මං බය උනත් ඒ බව පෙන්නන්නැ.

“ඇයි නෝනා ඔයා පොලිසීයෙද.....?”

“ඔව් ඇයි?” මීනු අක්කා ගහන්ඩ වගේ යනවා.

“ඕහෝ...... ඒකයි එහෙනං මේ........මේ නෝනා අපිට මේ වැඩේ කරගන්ඩ දීලා කරුණාකරලා පැත්තකට වෙන්ඩ.”

ඔහොම කියලා මං සාක්කුවෙන් දඩ සයිස් ෆෝන් එකක් ඇදලා ගන්නවා. ඒවා ඔක්කොම මං වේලස්සන හදාගෙන තියෙන්නෙ. කොයි වෙලේ ඕවා ඕනැ වෙයිද කව්ද දන්නෙ. පස්සෙ ඒරියල් එක දික් කරලා ස්කලීට කෝල් එකක් අරං මම ඉන්න තැන කියනවා. වෙලාව කියන්නෙ හැමදාම වගේ ෆෝන් එකෙන් කියනවා ස්කලී කොහෙදෝ ගිහිල්ලා පණිවිඩේ තියන්න කියලා. මම කරන්නෙ ඒරියල් එක නිකටට තියලා අකුලන ගමං ඒ මේ අතේ පොඩ්ඩක් විපරං කරන එක.

එතකොට ඒගොල්ලං මා දිහා බලං ඉන්නෙ නිකං පිස්සෙක් දිහා බලනවා වගේ කටවල් ඇදකරාගෙන. මං නං සැලෙයි ඒවට.

“මේ චුටි මහත්තයා එක්ස්ෆයිල් බැරිනං ඕන නාඩගමක් කරගන්නවද මෙතනින් එලියට ගිහිල්ලා”

“නාඩගමක්......මේ නෝනා ඔයා පොලිසියේ උනාට අපිට වැඩක් නෑ. කරුණාකරලා අපිට “භාධා” කරන්න එපා...... අපි දැං මේ මුලු ගේම කණපිට ගහලා හරි ඕගොල්ලං හංගං ඉන්න සක්වල ජීවියා හොයාගන්න ඕනැ......” අපි අපි කිව්වට ඔය ඔක්කොටම ඉන්නෙ මං විතරයි. ඒ උනාට මං බය නෑ. මෝල්ඩර් වගේම තමා.

කොහොමත් ඇත්තටමත් පොලිසියයි, සීඅයිඒ එකයි, එෆ්බීඅයි එක එක්කලා පොඩ්ඩක් හිත හොද නෑනේ. ඒක හින්දා මමත් කොහොමත් පොලිසිය ගණන් ගන්නැ. ඔය ගණන් නොගැනීමට ප්‍රධාන හේතුව උනේ පොලිසියයි, සීඅයිඒ එකයි පාලනය වෙන්නෙ ආරක්ෂක අමාත්‍යංශයෙන් වෙච්ච එක. ඒත් අපේ එෆ්බීඅයි එක සම්පූර්ණයෙන් හැඩල් කරන්නෙ අධිකරණ අමාත්‍යංශයෙන්නෙ. ඉතිං මං මොකට බය වෙන්ඩද ඒගොල්ලන්ට!

නවීන පන්නෙට හැදෙන ළමයෙක් හැටියට ඕවා දැනගත්තට මොකද කවදාවත් මීනු අක්ක හොදින් ඉන්න වෙලාවටවත් මම ඒ ගැන කියන්ඩ ගියෙ නැ එයාට. ඕවා දැනගත්තම ඒයා තවත් ඔලුව ඉදුමෝගනියි. එතකොට තව කෝලමක්.

කොහොමහරි සක්වල ජීවියා හොයාගන්න නං මේ මුලු සෙල්ලං ගෙදරම කණපිට ගහන්න වෙනවා. මං කරන්නෙ අහුවෙච්ච අහුවෙච්ච දේවල් එහෙ මෙහෙ ඇදලා දාන ගමං මොකක් හරි හෝඩුවාවක් හොයාගන්න බලන එක.

දන්නවනේ!

මෝල්ඩර් නං බලුප් එකක් නෙමේ, පෑනක් විතර දෙයක් වත් අත අරින්නැ. ඔක්කොම කුඩු කරා කරා සාක්ෂි හොයනවානෙ. ඒ අතිං මම මේ ගොල්ලන්ට හොද වැඩියි.

“දඩිං බිඩිං, ජරාස් බරාස්, සට්රස්, පට්රස්, හුටස්......” ඔය වගේ සද්දි එන්නෙ මගේ ඉන්වෙස්ටිගේෂන් එකේ අන්තිම හරියෙදී.

වැදගත් දේකට තියෙන්නෙ ඔහොම කරද්දි, ඔන්න එක අවස්ථාවක් එනවා ඒ ගොල්ලන්ගේ ඉවසීමේ සීමාව පනින. අන්න ඒ අවස්ථාව‍ට එන්ඩ කලින් මම සක්වල ජීවියා හොයාගන්ඩ ඕනැ. නැත්තං ඉවරයි!

අපේ නංගී “අම්මේ මේ අයියා....... කියාගෙනම” අත පස්සට අරං පණ නැති කරලා දීලා අදිනවා ආය තරු විසිවෙන්නෙ. අනිත් දෙන්නත් දීලා අදිනවා ඇති, මට ඒවා පේන්නැ ඒ වෙලාවට.

ඔය වගේ වේලාවක මෝල්ඩර් උනත් අත නළලට අරං නැමීගෙන දුවනවනේ. මමත් ඒකම කරනවා. බයකට නෙමේ. ඒක තමා උපක්‍රමශීලිව පසුබසිනවා කියන්නෙ.

මේ තියෙන්නෙ මෙන්න මෙහෙම.

අන්න එහෙම ලොකු කැපකිරීමක් කරලයි අපි ඉන්වෙස්ටිගේෂන් කලේ. පිට පුපුරු ගැහුවය, අතපය ඇඹරුනාය, ඉහලින් ඒවා නවත්තන්න කියලා ඕඩර් ආවාය කියලා අපි උත්සහය අත ඇරියෙ නෑ කවදාවත්.

ඒ හින්දා ඒවා කවදාවත් අපතෙ ගියෙත් නෑ!

මං එහෙම කියන්නෙ නිකං කටට ආවට කියලා හිතන්න එපා!

බොරුනං ඕගොල්ලත් මොල්ඩර් වගේ කැපවීමෙන් වැඩක් කරලා බලන්ඩකො. අරවගේ පොඩි පොඩි බාධක එනවා තමා. ඒ උනාට ඒවා පයිසෙකට මායිම් කරන්ඩ එපා.

මං නං හැමදාම හිතන්නෙත් ඇත්තටම හරි, සෙල්ලමට හරි ඔය එක එක ඉන්වෙස්ටිගේෂන් කරන හැමෝම වගේ මෝල්ඩර්ලා වගේ අය වෙනවනං කොච්චර හොදද කියලයි.

ඕගොල්ල මොකද කියන්නෙ?

..............................

-කෙහෙල්කොටුවේ චූටි මහත්තයා.