මෙන්න Big Mad Pill උණු උණුවේ ඩවුන්ලෝඩ් කරගන්න. | සයිබර් යායෙන් !

කියවන විට සිංහල ලියවෙන සුපිරි මෘදුකාංගය ගැන මම ඊයේ ඕගොල්ලන්ට කිව්වා. සමහරු ඊයේ අප්‍රේල් පළමු වැනිදා හින්දා තරමක් සැකයෙන් මේ ප්‍රවෘත්තිය දිහා බලලා තිබුනේ.

ඊයේ ඒ ගැන දැන ගන්ඩ ලැබුනෙ නැතිනම් කරුණාකරලා ඒ ලිපිය කියවලා ආවොත් මේ වැඩේට වඩා ලේසියි.

බීටලේ නම් දැක්කෙ මලයගෙ පොටෝ එක පසු බිමේ The Future Today කියලා තියෙනවලු. ඒක හන්දා මිනිහට සොෆ්ට්වෙයා එක එපාලු.

අනිත් අය කියලා තියෙන දේවලුත් මේ වෙද්දි මට කට පාඩම් වෙන තරමට හුරු වෙලා තියෙන්නෙ. හුඟක් අඳුරන මුණු එක්කලා අලුත් අයත් හරි හරියට එතන හිටියනෙ. 

පැතුම් හේරත් අහලා තිබුනා “අර මායා බන්ධන ඇඳුම හදපු එකයි, අකුණු පෙන්නපු කතාවයි ඔක්කොමත් බොරු ද, නැත්නම් රටින් ආපු සොෆ්ට්වෙයාර් එක විතර ද බොරු?“ කියලා.

ඒ ගැන වචනයක් කියලා හිටියොත්, මලයා මට නම් විශේෂ ඩයල් එකක්. මූලික දේ පොර මාර ස්පීඩ්. පොඩි කාලේ ගෙනල්ලා දූන්නු ජෝයිස්ටික් වලින් පොරට ඇත්තටම ගේමක් තිබුනේ නෑ. ලෙවල් එක නැට්ටටම දැම්මත් ඒ වේගෙට කලින් පොරට හිතලා ගේම ගොඩ දාගත්තැකි වට දෙක තුනක් යද්දි.

අර කියපු විදිහට මිනිහගෙ මදර් බෝඩ් එක හැදිලා තියෙන්නෙ අලුත් දේවල් වලටමයි. මායා බන්ධන ඇඳුම, අකුණු මැසිම වගේ දේවල් කොල්ලා හැදුවේ හෙන ම පොඩි දවස්වල. ටිකක් ලොකු උනාම ඇන්කර් පෙට්ටි රේඩියෝ, ටොපි මැසිම වගේ ජිල්මාට් කෑලි සෑහෙන්ඩ හැදුවා. තාත්තා අයින් කරන රේඩියෝ, ටීවී, සෙලියුලර් ෆෝන් වලින් කෑලි ගලෝගෙන ඇවිල්ලා මොකක් හරි ජල්බරියක් දාලා වෙනම ගැජමැටික් එකක් හදනවා. ඒවා පෙන්නද්දි ලඟට ගිහිං අල්ලලා කරලා බලන්ඩත් බයයි අත හපයි කියලා. මම බයේ උන්නෙ ඔහොම හදපු ජිමික් එකකට වෙලාවක පණ ඇවිල්ලා අපි සේරෝම දෙනාව කාලා දායි කියලා.

ඉදලා හිටලා මිනිහටත් වැරදුනා. එහෙම තමා අලුත් දේවල් හොයාගන්න යන ගමනේ දී. එදා කොල්ලා ලැබ් එක විදිහට යොදාගෙන තියෙන්නෙ තාත්තගෙ බැටරි චාජ් කරන කඩේ. කරගෙන ආපු පරීක්ෂනේ පොඩ්ඩක් එහෙ මෙහෙ වේලා මුලු බැටරි කඩේටම ගිනි ඇවිලුනා මෙහෙම කරද්දි.

කොහොමහරි දැං කොල්ලා වැඩ කරන්නෙ බීටලේ හොයා ගත්තු විදිහට The Future Today කොම්පැනියේ. මූණුපොතේ මිනිහගේ අන්වර්ථ නාමෙනේ ඔය Big Mad Pill කියන්නෙ. ඒ උනාට කොල්ලා ඔය වැඩ කරන තැන ගැන හිතලා බලද්දි එතන පොඩි කොස්සක් තියෙනවා කියලා මට කොච්චරවත් හිතෙනවා. මිනිහා දැන් කරන වැඩ කොටස දැන උගත් ඕනැම පොරකට කරන්න පුලුවන්. ඒ උනාට අරවගේ ජිමික් ඔලුවක් හැමෝටම පිහිටන්නෙ නෑ. ඒකයි!

ඒ කතාව ඉවරයි. එහෙනම් මෙන්න ඕගොල්ලන්ට වැදගත් ටික.

Big Mad Pill!

ඕක ඕන කට්ටිය අදහස් ලියලා යන්ඩ කිව්වම, සමහරු කෙලින්ම ඕක එපා කිව්වා. ඉතිං ඒකත් අදහසක්නෙ. සමහරු මගේ උපන්දිනේ කියලා සුබ පැතුවා. ඉතිං ඒකත් අදහසක්නෙ. ඔය විදිහට විවිධ කට්ටියගෙ විවිධ අදහස්. සමහරු කෝකටත් කියලා සද්ද නැතුව ගිහිං සඳුදා අටට එන්නත් හිතාගෙන ඇති.

ඒක නිසා තෝරා බේරාගැනීම ලේසි නෑ. අනික අපි හිතුවෙ මේක කොහොමත් නොමිලේ දෙන්නනෙ. ඒක නිසා තේරිලි බේරිලි ඕනේ නෑ. ඔක්කෝමලා ඩවුන්ලෝඩ් කරලා ම බලන්න.

හැබැයි මතක ඇතුව ඕක මෙව්වා කරලා ගුණ දොස් කියලා යන්ඩ නම් අමතක කරන්ඩ එපා. ඒකයි මේවගේ තැනකදී අපිට වැදගත් වෙන්නෙ.

එහෙනම් ආයෙත් දවසක හමුවෙමු. මෙන්න ලින්ක් එක.

.....................

- යූරෝ දෙකේ වීරයා.