අද කාටුන් - 10 - බුදුරජාණන් වහන්සේ....! | පෝය ඩේ ස්පැෂල්.

බුදුරජානන් වහන්සේ මේ ලොව පහල වු අති උත්තම පුරුෂ රත්නයය.

ලෝභ, ද්වේශ, මෝහ අකුශල ධර්මයෝ සපුරාම නැසුවා වූ නික්ලේශී උතුමන් අතර අග්‍රතමයාණෝය. සසර පුරා මනා කොට වඩනා ලද බුද්ධ කාරක පාරමී ධර්ම හේතුවෙන්, කලාගාරයක් බඳු වූ, දුටු දුටුවන් මන බඳනා පෞරුෂයෙන් යුත් රූ සිරින් හෙබි සිරුරක් දැරු මහා පින්වතාණෝය. සිංහයෙකුගේ බඳු ප්‍රෞඩ ගමන් ඇති, අනතුරු හමුවේ නොසැලෙන අභීතයාණෝය. බුද්ධත්වයට පත් වී හතලිස් පස්වසරක් පුරා තමන්ට කියා මොහොතක් වෙන් කර නොගනිමින්, නිදි සුව ලැබීම ද දෙපැයක් වන් සුලු කාලයකට සිමා කොට සියලු දෙව් මිනිසුන්ගේ අවුල් තැවුල් වලට අකාලික වූත්, ප්‍රායෝගික වුත්, සර්ව සාධාරණ වූත් දහම් විසඳුම් පෙන්වා දුන් උත්තමයාණෝය.

බ්‍රහ්ම ස්වරයෙන් ද, ඔපවත් වූ මනා වූ ස්වර ගලපා සඳහම් අමා වැසි වැස්ස වූ සුමධුරයාණෝය. මනු ලොවද, සදෙව් ලොවද ඇතිතාක් සුවඳ මනහර මලින් පුදන්න එකම සුදුස්සාණෝය. ලොව ඇති තාක් මිහිරි සුවඳ දුමින් පුජා කරන්නට සුදුස්සාණෝය. සක්වල ගබ පුරා මිණි පහන් දල්වා ආලෝක පූජා කරන්නට  සුදුස්සාණෝය. මධූර වු අග්‍රභෝජන පූජා කරන්නට සුදුසු උත්තම ප්‍රතිලාභියාණෝය.

“බුද්ධ“ යන වචනයෙන් පවා චිත්ත සංතානයක නිතර සිහි කරන්නට ශ්‍රේෂ්ඨ වූ මිහිරාණෝය. අප චිත්ත සන්තානයට නිතර වැඩමවා ගන්නට සුදුසුකම් ඇති අග්‍රතර නිකෙලෙස් පිවිතුරාණෝය. අග්‍ර වෙදැඳුරාණෝය.

කවරාකාර හෝ දුකක් ඇතොත් කියන්නට සුදුසු හිතෛෂිවන්තයාණෝය. ජීවිතයේ දුක් දොම්නස් දුරළන්නට සරු උපදෙස් දෙන කළණ මිතුරාණෝය. උත්පත්තියද අති උත්තම වූ පරිනිර්වාණයද අති උත්තම වූ පින්වන්තයාණෝය. දුන් දේ වෙනුවෙන් තුති පිදුම් ද ගැතිකම් ද යාදිනි ද ඉල්ලා නොසිටින මහත්මා බවින් පිරිපුන් අග්‍රස්ත මහතාණෝය.

බුදු රුව දෙස බලා සිත පහදවා ගත් පමණින් ද, සුමධුර වූ හඬ අසා සිත පහඳවා ගත් පමණින්ද දෙව් මිනිස් සැප අත්පත් කර දෙන පරම ජීවිතාරක්ෂකයාණෝය. දමනය කළ නොහැකි මිනිස්, දේව, යක්ෂ, නාග, බ්‍රහ්ම යනාදී නානා විධ මානයෙන් උඩගු වූවන් මනා කොට දමනය කළ බලවතාණෝය. හාස්කම් වසුරු පිඩක් සේ ඉවත ලූ, සුමධුර ධර්මයෙන් ම ජිවිතාවබෝධය ලබා දුන් පියාණෝය.

ස්වකිය විශිෂ්ඨ ඥාණයෙන් අවබෝධ කරගත් ධර්මයෙන් සහශ්‍රී ලෝක ධාතුවටත්, ඉන් ඔබ්බටත් දහම් අමා වැසි වැස්සවූ ශ්‍රීමතාණෝය. “බුද්ධ“ යන වචන මාත්‍රය සිහි කලත් සියලු ආරක්ෂා ගෙන දෙන්නා වූ අති උත්තම ආරක්ෂකයාණෝය. විශ්වයේ කිසිඳු ශාස්තෘවරයෙකුට නොමැති “යමාමහ පෙළහර“ පාන හැකියාව ඇති, රජුන් අතර මහෝත්තම රජූ වූ බුදු රජාණෝය.

මහා බල ඇති රහතන් වහන්සේලා සතර නමක් විසින් කල්පයක් පුරා කියන ලද ද, කල්පය අවසන් වුවත් අවසන් කළ නොහැකි ගුණයෙන් යුතු බුදුරජාණන් වහන්සේගේ රුව මම කෙසේ සිත්තම් කරන්නද?

බුදු රජාණන් වහන්සේගේ නව අරහාදී බුදු ගුණ මෙනෙහි කරමින් බුදුරුව සිතේ සිත්තම් කරගන්නවා මිස.....!

 .................................

- මීට විදෙස් සිත්තරා

(ඇසුර - චන්දන බණ්ඩාර මහතා - සදහම් දේශක, සදහම් ලේඛක)